क्षण ऊनसावल्यांचे सरतील सांजवेळी
सारेच सारखे मग दिसतील सांजवेळी
तुलना उगाच होते वेगात धावण्याची
सारे थकून खाली बसतील सांजवेळी
मिळतील चालताना कित्येक सोबतीला
जे कोण आपले ते कळतील सांजवेळी
शोधायला निघाले दाणे मनाप्रमाणे
घरट्याकडेच पक्षी वळतील सांजवेळी
ओसाड पार हल्ली हे स्वप्न पाहतो की
एकत्र लोक येथे जमतील सांजवेळी
घडल्यात ज्या चुका अन् जे साधता न आले
बाबी लहानमोठ्या छळतील सांजवेळी
सगळाच वेळ गेला देवाशिवाय ज्यांचा
ते दीप देवपूजा करतील सांजवेळी
© भूषण कुलकर्णी
हे गाणं नक्की ऐका:
