उदास बसलेल्या झाडाला बरे वाटले आहे
बऱ्याच दिवसांनंतर कोणी इथे थांबले आहे

पाने हिरवीगार पाहतो सावलीत बसणारा
कसे कळावे, कुणी केवढे ऊन सोसले आहे

सावलीतही सदा उन्हाची भीती वाटत असते
येथे नाही कल्पवृक्ष हे किती चांगले आहे!

एक कवडसा पडला आहे गर्द सावलीमध्ये
बहुधा एखादे सोनेरी पान हरवले आहे

झाडाखाली आता थोडे पाणी निथळत आहे
शक्य तेवढे तर त्याने आधीच झेलले आहे

© भूषण कुलकर्णी