वागणे होते तुझे पाऊस पडल्यासारखे
वाटले होते उन्हाला चिंब भिजल्यासारखे

ओळखीपुरतेच इतरांशी अता बोलायचे
त्यापुढे वागायचे कोणीच नसल्यासारखे

या जगाच्या मद्यशाळा काय कामाच्या मला?
वाटले नाही कधीही कैफ चढल्यासारखे

खूप गोष्टींचा अम्हाला अर्थ नाही लागला
ते घडत होते म्हणे आधीच ठरल्यासारखे

पाहिजे शोधायला काहीतरी आता नवे
त्याविना वाटेल का हा काळ सरल्यासारखे?

© भूषण कुलकर्णी