चंद्रताऱ्यांनो जरा स्वप्नात या माझ्या
रोजचे सलते ग्रहण डोळ्यात या माझ्या

ईश्वराचा नेमका पत्ता मला कळला
सांगतो, आधी तुम्ही धर्मात या माझ्या!

मार्ग कुठला योग्य, ओळखणे किती सोपे!
टाकले काटे तुम्ही मार्गात या माझ्या

बंद झाला बघ पुन्हा पुढचा नवा रस्ता
पाहणे मागे पुन्हा नशिबात या माझ्या

उंच गेल्यावर अशी रुखरुख मला होती
अर्धवट पृथ्वी दिसे क्षितिजात या माझ्या

सांगते पृथ्वी, पुन्हा येशील तू येथे
वाट कुठलीही निवड गोलात या माझ्या

© भूषण कुलकर्णी