दिवे लागल्यावर तुझी भेट व्हावी
तृषा चेतल्यावर तुझी भेट व्हावी
अता शाल घेईल ती चांदण्यांची
नदी झोपल्यावर तुझी भेट व्हावी
कसा शांत होणार बेभान वारा?
म्हणे, थांबल्यावर तुझी भेट व्हावी
दवाचा प्रथम स्पर्श अलवार झाला
फुले लाजल्यावर तुझी भेट व्हावी
तुझ्या आठवांनी दिशा व्यापलेल्या
धुके दाटल्यावर तुझी भेट व्हावी
सरींनी नव्या तृप्त होईल माती
नि गंधाळल्यावर तुझी भेट व्हावी
पहा चंद्रताऱ्यांसही झोप आली
किती जागल्यावर तुझी भेट व्हावी?
निघालो सखे सत्य शोधायला मी
तिथे पोचल्यावर तुझी भेट व्हावी
© भूषण कुलकर्णी
हे गाणं नक्की ऐका:
