सुंदर आहे विश्व, आणखी सुंदर झाले असते
सगळ्यांना जर मनापासुनी हसता आले असते

आत उतरलो तेव्हा खोली जाणवली डोहाची
फक्त त्यामधे खडे टाकुनी काय कळाले असते?

तुझ्या सुगंधी फुलण्याला मी दुरून पाहत होतो
हात लावता फूलपाखरू दूर उडाले असते

टोकाचे नसतेच एवढे मंथन आयुष्याचे
उगा वाटते विषात वा अमृतात न्हाले असते

भेट व्हायची पुन्हा कधी हे आता माहित नाही
म्हणून तारे थांबलेत, अन्यथा निघाले असते

© भूषण कुलकर्णी