खऱ्या प्रेमात किंमत मागताही येत नाही 
सुदामा द्वारकेहुन एक वस्तू नेत नाही 

तपस्या एक झाल्यावर नको वर पाच मागू 
कुण्या एका जिवाला पूर्णता मी देत नाही 

परीक्षा घ्यायची आहे सभेतिल कौरवांची
खरोखर पाच गावे मागण्याचा बेत नाही 

खरे होईल खोटे गोपिकांना भेटल्याने 
बघा सांगून, कान्हा गोकुळाला येत नाही 

मनामध्ये सतत राधा स्मरण करते प्रियाचे
तरी लोकांपुढे ती नाव त्याचे घेत नाही 

कुणावर प्रेम व्हावे अन कुणाशी युद्ध व्हावे 
नियतकर्मात ठरलेले तुझ्या क्षमतेत नाही 

-भूषण कुलकर्णी