एक विनंती केली आहे ताऱ्याने 
मला नका बोलावू कुठल्या नावाने 

उगाच रेषा जोडत बसलो त्याच्याशी 
तारा बसला होता स्वतंत्र मानाने 

स्वतःभोवती, जगाभोवती फिरत रहा 
काळ व्यापला आहे एका कामाने 

देश सोडला स्वतंत्र जगण्यासाठी मी
अता बंधने घातलीत परदेशाने 

फक्त निरीक्षण करतो हल्ली दुनियेचे 
समाज काही बदलत नाही माझ्याने 

युद्धासाठी आसुसलेली ही दुनिया 
कुठे कुठे अन कसे पहावे देवाने! 

-भूषण कुलकर्णी