सहज कुणाला भेटला राम?

दशरथाने स्वधर्म रक्षिला
पुत्रावीण चिंतित राहिला
शरयूतीरी यज्ञ योजिला
किती थोर दानधर्म केला!
तेव्हा तिथे अवतरला राम
सहज कुणाला भेटला राम?

अहिल्या झाली होती शिळा
जगताची जाण नुरली तिला
श्रीरामाच्या चरणांपाशी
त्या जीवनाचा अर्थ सगळा
म्हणून शेवटी कळला राम
सहज कुणाला भेटला राम?

आश्रमात राहिली शबरी
सेवा गुरूंची केली खरी
श्रीरामाच्या आगमनाच्या
प्रतीक्षेत होती जन्मभरी
म्हणून तिथे विसावला राम
सहज कुणाला भेटला राम?

दशरथासम यज्ञ जमेना
शबरीसम सेवा घडेना
अहिल्येसम श्रीचरणांविना
इतर जगाचा भास चुकेना
तरी कुणी मज भेटवा राम!
तरी कुणी मज भेटवा राम!

© भूषण कुलकर्णी