वेगळासा अर्थ घेऊ लागली रामायणे
रावणाच्या सद्गुणांची चालली पारायणे

थोर भक्ती रावणाची, मान्य हे केले जरी
शिवसमर्पण राघवाचे आठवावे अंतरी
सोडल्याविन मीपणा का होतसे भक्ती खरी?
भक्तीतेजाला ग्रहण लागे अहंकारीपणे
रावणाच्या सद्गुणांची चालली पारायणे

राम भरतास्तव स्वतःचे राज्यवैभव त्यागतो
अन् दशानन जाणत्या बंधूसही झिडकारतो
राज्य अन् परिवार युद्धाच्या दिशेने हाकतो
मात्र बहिणीस्तव पहा सीताहरण केले म्हणे!
रावणाच्या सद्गुणांची चालली पारायणे

ही सवय आता जगाचे सत्य झाकू लागली
दुर्जनांच्या दुर्गुणांना देत माफी चालली
सरमिसळ दुष्कर्म अन् दुर्भाग्य यांची वाढली
आपले कर्तव्य आहे सत्य जे ते शोधणे
रावणाच्या सद्गुणांची चालली पारायणे

©️ भूषण कुलकर्णी