ती मनात जेव्हा येते
सामर्थ्य केवढे देते!
पण जास्त थांबली नाही
प्रेरणा राहिली नाही

ऐकले गीत राजांचे
वाजले शंख क्रांतीचे
मग निवांत बसलो आम्ही
प्रेरणा राहिली नाही

पाहिले दीन अन् दुर्बळ
वाटली जराशी कळकळ
पण आत पोचली नाही
प्रेरणा राहिली नाही

वाचले थोर शास्त्रज्ञ
कळले, ज्ञान हेच सत्य
पण ध्यास लागला नाही
प्रेरणा राहिली नाही

ठरवले ध्येय वर्षाचे
अन् पुढे उभ्या जन्माचे
चाललो न अजुनी काही
प्रेरणा राहिली नाही

© भूषण कुलकर्णी