सुंदर स्वप्ने तिच्या उरी
निजली आहे एक परी

जोजवती तिज गाता गाता
शीत मंद झुळुकांच्या लाटा
तारे लुकलुकती अंबरी
निजली आहे एक परी

तिच्या सभोती फूलपाखरे
कितीकिती नाजूक पहारे!
हळू थांबती ओठांवरी
निजली आहे एक परी

तिला चांदणे टिपते अलगद
तिला स्पर्शतो वारा सावध
कला शिकव ही मला तरी
निजली आहे एक परी

तिच्या बटांना जरा छेडु का?
या ओठांवर ओठ ठेउ का?
नको नको, थांब क्षणभरी
निजली आहे एक परी

© भूषण कुलकर्णी