वाजवते मुरली राधा
जी कृष्ण ठेवुनी गेला
पूर्वीहुन मंजुळ इतकी
का वाटे चराचराला?

कृष्णाची मुरली पूर्वी
राधेला हाका देई
ह्रदयात जेवढी प्रीती
अंतरी खोल ती जाई

राधेची मुरली आहे
कृष्णाला बोलवणारी
त्यानेच व्यापल्या साऱ्या
सृष्टीला डोलवणारी

राधेची मुरली ऐकुन
सावळी आठवण येते
गोपींचे अश्रू झरती
गायींचे मन व्याकुळते

आभाळ निळे गहिवरते
यमुनेचे पाणी हलते
गोवर्धन शिखर पुन्हा त्या
मानाने खुलते, फुलते

शरदाच्या चांदणराती
ती मुरली वाजवताना
या दृश्य पूर्ततेसाठी
येणार लाडका कान्हा!

© भूषण कुलकर्णी